चौरजहारीमा सरकारी मोटरसाईकल दुर्घटना हुँदा दुई किशोर घाईते

रुकुम पश्चिमको चौरजहारीमा मोटरसाईकल दुर्घटनामा परेर दुई किशोर घाईते भएका छन् । 

आईतबार दिउँसो चौरजहारी नगरपालिका २ स्थित ट्राईल सेन्टर नजिकै कर्णाली प्रदेश ०२००१ ब ७०१ नम्वरको सरकारी मोटरसाईकल दुर्घटना भएको हो । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक ऋषि पाठकका अनुसार मोटरसाईकल दुर्घटनामा परेर चौरजहारी नगरपालिका १२ निवासी १७ बर्षीय चालक लक्ष्मण शर्मा र वडा नम्वर १३ निवासी १५ वर्षीय प्रज्वल शर्मा घाईते हुनुभएको हो । 

ट्राईल सेन्टरदेखि यातायात कार्यालय जाने क्रममा अनियन्त्रित भएर मोटरसाईकल दुर्घटना भएको बताईएको छ । घाईतेहरुलाई तत्कालै उद्धार गरेर चौरजहारी अस्पतालमा उपचार गरिएको छ । दुबै जनाको हात र खुट्टामा चोट लागेको छ । 

प्रहरी निरीक्षक पाठकका अनुसार सरकारी नम्वर प्लेट भएको मोटरसाईकल इलाका प्रहरी कार्यालयको नियन्त्रणमा रहेको छ । चालकसँग कुनै पनि कागजपत्र नभएको थप अनुसन्धान सुरु गरिएको बताइएको छ । 

सरकारी मोटरसाईकल कागजपत्र बिनै कुन प्रयोजनका लागि अनाधिकृत व्यक्तिले प्रयोग गरेका हो भन्ने बिषयमा अनुसन्धानपछि खुल्ने र त्यसपछि आवश्यक कारबाहिको प्रक्रिया सुरु गरिने प्रहरीको भनाई छ ।