रुकुममा पाँच विधामा ब्याडमिन्टन प्रतियोगिता सुरु, १०४ टिम बिच प्रतिश्पर्धा

रुकुम पश्चिममा विभिन्न पाँच विधामा ब्याडमिन्टन प्रतियोगिता सुरु गरिएको छ । जिल्ला ब्याडमिन्टन संघको आयोजनामा भएको तेस्रो संस्करणको ब्याडमिन्टन प्रतियोगिताको मुसिकोट नगरपालिका प्रमुख महेन्द्र केसीले एक कार्यक्रमका बिच उद्घाटन गर्नुभएको छ । 

संघका जिल्ला अध्यक्ष अनिल बुढाका अनुसार रुकुम पश्चिमलाई खेलका माध्यामबाट चिनाउन र पर्यटन प्रवद्र्धन गर्न विभिन्न पाँच विधामा ब्याडमिन्टन प्रतियोगिता आयोजना गरिएको हो । उहाँका अनुसार विभिन्न विधामा १०४ टिमले भाग लिएका छन् । 

आयोजकका अनुसार पुरुष डबल खुला (अल नेपाल) तर्फ २४ टिम, रुकुमपश्चिम पुरुष डबल खुलामा ३५ टिम, रुकुम पश्चिम खुला महिला डबल विधामा आठ टिम र १९ वर्ष मुनिको पुरुष एकलतर्फको प्रतियोगितामा सात जनाले भाग लिएका छन् । त्यसैगरी कर्णाली प्रदेश पुरुष डबल ब्याडमिन्टन प्रतियोगितामा ३० टिमले प्रतिश्पर्धा गर्ने बताईएको छ । 

मुसीकोट नगरपालिका -१ स्थित मिनिकवर्डहलमा तीन दिनसम्म सञ्चालन हुने यस प्रतयिोगिताको ५ वटै इभेन्टमा एकैसाथ प्रतिस्पर्धा गराउने तयारी रहेको संघका सचिव विशाल बिष्टले जानकारी दिनुभयो । 

अल नेपाल खुला ब्याडमिन्टनको विजेता जोडीले ५२ हजार नगद, ट्रफि, मेडल र प्रमाण पत्र प्राप्त गर्दा उपविजेता जोडीले ३१ हजार नगद, ट्रफि, मेडल र प्रमाणपत्र प्राप्त गर्ने छन् । सान्त्वना दुई जोडीलाई समान ११/११ हजार पुरस्कारको व्यवस्था गरिएको छ । 

रुकुम पश्चिम जिल्ला स्तरीय खुला पुरुष डबल ब्याडमिन्टनको विजेता जोडीले ३० हजार र उपविजेता जोडीले २० हजार नगद, ट्रफि, मेडल र प्रमाण पत्र प्राप्त गर्ने छन् । सान्त्वना दुई जोडीले समान ५/५ हजार पुरस्कार पाउने छन् । 

त्यस्तै महिला तर्फको विजेता जोडीले १५ हजार, उप विजेताले ८ हजार र सान्त्वना जोडीले समान ३/३ हजार पुरस्कार पाउने सचिव विष्टले जानकारी दिनुभयो ।  

कर्णाली प्रदेश खुला पुरुष डबल ब्याडमिन्टनको विजेताले ३२ हजार, उप विजेताले २० हजार र सान्त्वना हुने दुई जोडीले समान ६/६ हजार पुरस्कार पाउने बताईएको छ । रुकुम पश्चिम जिल्ला स्तरीय १९ वर्ष मुनिको पुरुष सिङ्गल ब्याडमिन्टनको विजेताले १५ हजार, उप विजेताले ८ हजार र सान्त्वना हुने दुई खेलाडीले समान ३/३ हजार पुरस्कार पाउने छन् ।

त्यस्तै सबै इभेन्टका एकएक जना वेष्ट प्लेयरलाई दुई हजार पाँच सय नगद, मेडल र प्रमाणपत्र प्रदान गरिने आयोजकले जनाएको छ ।  अहिले रुकुम पश्चिम खुला महिला डबल र रुकुम पश्चिम जिल्ला स्तरीय १९ वर्ष मुनिको पुरुष सिङ्गलका प्रतिश्पर्धीहरु बिच खेल सञ्चालन भईरहेको छ ।