रुकुममा ब्याडमिन्टन : अल नेपाल खुला पुरुषतर्फ नवराज र मुस्कानको जोडी प्रथम

रुकुम पश्चिमको मुसिकोट नगरपालिका –१ मा बुधबारदेखि जारी विभिन्न पाँच विधाको ब्याडमिन्टन प्रतियोगिता अन्तर्गत अल नेपाल खुला पुरुष डबल ब्याडमिन्टन विधाको फाईनल खेल सम्पन्न भएको छ । 

बिहिबार बेलुका भएको फाईनल खेलमा रुकुम पश्चिमको आठबिसकोट निवासी नवराज मल्ल र मुस्कान केसीको जोडी विजेता बनेको छ । दाङ निवासी हिमांसु कुँवर र विवेक चौधरीको जोडिलाई हराउँदै मल्ल र केसीको जोडी विजेता बन्न सफल भएको हो । 

जिल्ला ब्याडमिन्टन संघको आयोजनामा भएको तेस्रो संस्करणको ब्याडमिन्टन प्रतियोगितामा विभिन्न पाँच विधामा प्रतिश्पर्धा भईरहेको छ । संघका जिल्ला अध्यक्ष अनिल बुढाका अनुसार अल नेपाल खुला पुरुष डबल ब्याडमिन्टनतर्फ विजेता जोडीले जोडीले ५२ हजार नगद, ट्रफि, मेडल र प्रमाण पत्र प्राप्त गर्नेछन् । त्यसैगरी उपविजेता हिमांसु र विवेकको जोडीले ३१ हजार नगद, ट्रफि, मेडल र प्रमाणपत्र प्राप्त गर्ने छन् । 

यस विधामा सान्त्वना स्थान प्राप्त गर्ने दुई जोडीलाई समान ११ हजार पुरस्कारको व्यवस्था गरिएको छ । अध्यक्ष बुढाका अनुसार रुकुम पश्चिम निवासी ईश्वर रावल तथा शिखर केसी र सुर्खेत निवासी खगेन्द्र खत्री र कृष्ण रानाको जोडिले सान्त्वना स्थान हाँसिल गरेका छन् । यस विधामा विभिन्न २४ जोडिले प्रतिश्पर्धा गरेका थिए । 

आयोजकका अनुसार अन्य चार विधाका खेलहरु बिच प्रतिश्पर्धा चलिरहेको छ । रुकुम पश्चिम पुरुष डबल खुलामा ३५ टिम, रुकुमपश्चिम खुला महिला डबल विधामा आठ टिम, १९ वर्ष मुनिको पुरुष एकलतर्फको प्रतियोगितामा सात जना र कर्णाली प्रदेश पुरुष डबल ब्याडमिन्टन प्रतियोगितामा ३० टिमले प्रतिश्पर्धा गरिरहेका छन् । 

मुसिकोट नगरपालिका १, स्थित मिनिकवर्डहलमा जारी यो प्रतियोगिता अन्तर्गतका अन्य खेलहरु जारी रहेको संघका सचिव विशाल बिष्टले जानकारी दिनुभयो । शुक्रबार सबै खेल फाईनल गर्ने तयारी रहेको उहाँले जनाउनुभयो ।   

रुकुम पश्चिमलाई खेलका माध्यामबाट चिनाउन र पर्यटन प्रवद्र्धन गर्न विभिन्न पाँच विधामा ब्याडमिन्टन प्रतियोगिता आयोजना गरिएको हो ।