आठबिसकोटमा विद्यालय परिसरमै डम्पिङ साईड, बालबालिकाको पढाई र स्वास्थ्यमा असर

रुकुम पश्चिम । विद्यालय क्षेत्रलाई शान्ती क्षेत्र मानिन्नछ । गुणस्तरिय शिक्षा प्रदान गर्ने विद्यालयमा शान्त र स्वच्छ वातावरण हुनुपर्ने व्यवस्था समेत रहेको छ । 

तर, रुकुम पश्चिमको आठबिसकोट नगरपालिका ९, राडिस्थित सहिद स्मृति दिपज्योती नमूना माध्यमिक विद्यालय परिसरमा डम्पिङ साईट (फोहोर फाल्ने स्थान) रहेको छ । यहि डम्पिङ साईटबाट दिनहुँ आउने दुर्गन्ध र फोहोर जलाउँदा फैलने धुँवाको कारण यहाँ अध्ययनरत करिब आठ सय बालबालिकाको पढाई प्रभावित हुनका साथै स्वास्थ्यमा समेत असर पर्ने गरेको गुनासो रहेको छ । 

विद्यालयको हातासँगै जोडिएको खोला छेउमा विगतदेखि नै नगरपालिका क्षेत्रको फोहोर फाल्ने गरिएको छ । यहि विद्यालयसँग नगरपालिकाको प्रशासकीय भवन समेत निर्माणधिन छ । आठबिसकोटको केन्द्र राडि र सिमबजार नजिकै रहेको यो डम्पिङ साईट तत्काल हटाउन यहाँका बालबालिका समेतले माग गरेका छन् । 

आठबिसकोटको नगरस्तरिय बाल सञ्जालका अध्यक्ष रिजन शर्माले विद्यालयसँगै डम्पिङ साईट रहेकोले दुर्गन्ध फैलनुका साथै धुवाँ फैलिएर कक्षाकोठामा जाने गरेको बताउनुभयो । यस कार्यले शान्त, भयरहित र स्वच्छ वातावरणमा पढ्न पाउनुपर्ने बालबालिकाको अधिकार हनन् भएको उहाँको भनाई छ । विद्यालयदेखि एक सय मिटर दुरीमै रहेको डम्पिङ साईटको असरले विद्यार्थीहरु बिरामी समेत हुने गरेको नगर अध्यक्ष शर्माले जानकारी दिनुभयो । 

डम्पिङ साईट तत्काल हटाउन माग गर्दै सञ्जालले आठबिसकोट नगरपालिकाको पनि ध्यानाकर्षण गराएको छ । सञ्जालका अध्यक्ष शर्माले नजिकै रहेको स्थानीय सरकार र विद्यालय प्रशासनले समेत यस बिषयमा जिम्मेवारीपूर्वक पहलकदमी नलिएको गुनासो गर्नुभएको छ ।  

विद्यालयका प्रधानाध्यापक जीतबहादुर ओलीले डम्पिङ साईटको कारण विद्यालय र बालबालिकामा नकारात्मक असर परेको बताउनुभयो । बजार क्षेत्र र स्थानीयवासीले फाल्ने गरेको फोहोर जलाउँदा दुई तीन दिनसम्मै धुवाँ आउने र दुर्गन्ध फैलने गरेको उहाँले उल्लेख गर्नुभयो । पहिला अन्यत्रै भाडाको घरमा सञ्चालित यो विद्यालय २०७९ सालमा उक्त स्थानमा सारिएको हो ।

नगरपालिका समेत जोडिएको हुनाले अन्यत्रै सार्न पहल गर्ने बताईएतापनि हालसम्म उक्त समस्या समाधान नभएको प्रधानाध्यापक ओलीले जनाउनुभयो । शिशु कक्षादेखि १० कक्षासम्म सञ्चालित यस बिद्यालयमा ८०९ जना विद्यार्थी भर्ना भएतापनि हरेक दिन सात सय बढी विद्यार्थी उपस्थित हुने गरेको विद्यालयको तथ्याङक रहेको छ ।

यस विषयमा आठबिसकोट नगरपालिकाका उपप्रमुख धनकुमारी शाहीले डम्पिङ साईट भएको ठाउँमा विद्यालय बनाउँदा उक्त समस्या समाधानमा ढिलाई भएको बताउनुभयो । डम्पिङ साईट निर्माण गर्नका लागि हेरिएको जग्गामा विवाद भएपछि फेरि वडा नम्वर ११ मा जग्गाको खोजी गरिसकिएको उहाँले जानकारी दिनुभयो ।

अब बजेट व्यवस्थापन गरेर डम्पिङ साईट निर्माण गर्ने योजना रहेको उपप्रमुख शाहीले उल्लेख गर्नुभयो । नगरपालिका आफैले पनि यो समस्याको दिगो समाधान खोजीरहेको र बालबालिका समेतले ध्यानाकर्षण गराएको उहाँले जनाउनुभयो ।