सोसल मिडिया
रुकुम पूर्व / जिल्लाको लागि भनेर आएको कोरोना बिरुद्धको खोप प्रदेश कार्यालयमा फिर्ता गरिएको छ । रुकुम पूर्वमा कोरोना बिरुद्धको पहिलो डोज (मात्रा) लगाएका १५ हजार बढी नागरिकले दोश्रो डोज नलगाएपछि फिर्ता गरिएको हो ।
जिल्लामा खोपको लक्षित जनसंख्याको २३ हजार ३ सय ८ जना (७१ प्रतिशत)ले कोरोना विरुद्धको खोपको पहिलो मात्रा लगाएपनि दोस्रो मात्रा लगाउनेहरु भने लक्षित जनसंख्याको २५.५ प्रतिशत अर्थात ८ हजार ३ सय १० जना मात्र रहेको स्वास्थ्य सेवा कार्यालय रुकुम पूर्वले जनाएको छ ।
पहिलो मात्रा लगाएका १५ हजार ७ सय १८ जनाले भने अझै दोस्रो मात्राको खोप नलगाएको स्वास्थ्य कार्यालय रुकुम पूर्वका सुचना अधिकारी एवम् कोरोना रोग नियन्त्रण फोकल पर्सन निमप्रसाद गिरीले जानकारी दिनुभयो ।
जिल्लामा खोप लगाउने लक्षित जनसंख्या भने १८ वर्ष भन्दा माथिका ३२ हजार ६ सय १६ हो । खोप लगाउने लक्षित मानिसहरु खोप लगाउन नआएपछि जिल्लामा आएको खोप प्रदेशमा फिर्ता गरेको स्वास्थ्य कार्यालयले जनाएको छ ।
बिचमा केहि समय रोकिएको खोप कार्यक्रम यहि मंसिरको ६ गतेबाट १४ गतेसम्म चल्ने बताइएको छ । यो बिचमा यसअघि कोभिशिल्ड र एस्ट्राजेनेकाको पहिलो मात्रा लगाएकाहरुलाई दोस्रो मात्राको खोप लगाइने कोरोना रोग नियन्त्रण फोकल पर्सन गीरीले बताउनुभयो ।
उहाँकाअनुसार भूमे गाउँपालिकामा ६, ७ र ८ गते, पुथाउत्तरगंगा गाउँपालिकामा ९, १० र ११ गते, सिस्ने गाउँपालिकामा १२, १३ र १४ गते खोप कार्यक्रम चल्ने छ । तोकिएका मितिमा तीनवटै गाउँपालिकाका सबै खोप केन्द्रबाट कोभिशिल्डको दोस्रो मात्रा लगाइने फोकल पर्सन गिरिको भनाई छ ।
