घर पोत्ने माटो ल्याउन गएकी एक महिलाको ढिस्कोले पुरिएर मृत्यु, पाँच घाईते 

हुम्लाको सर्केगार्ड गाउँपालिका– ७ को रोडिकोट गाउँ नजिकैको वनमा माटो खन्ने क्रममा माथिबाट ढिस्को खस्दा पुरिएर एक जनाको मृत्यु भएको छ । 

बुधबार बिहान माटोको ढिस्को खस्दा एक महिलाको मृत्यु भएको छ भने पाँच जना घाईते भएका छन्  । घर लिपपोत गर्ने माटो खन्ने क्रममा माथिबाट ढिस्को खसेर रोडिकोट निवासी २८ वर्षकी नेत्रकला जैसीको घटना स्थलमै मृत्यु भएको प्रहरीले जनाएको छ ।

त्यसैगरी सो ढिस्कोमा पुरिएर सोही गाउँकी २५ वर्षकी तीर्थकला जैसी, २७ वर्षकी मालती जैसी, २६ वर्षकी बाल्नी जैसी, २० वर्षकी लक्ष्मी जैसी गम्भीर घाईते रहेको र २६ वर्षकी भन्जली जैसी सामान्य घाईते भएको हुम्ला प्रहरीले जानकारी दिएको छ । 

घाईतेहरुलाई घटानास्थलबाट उद्धार गरेर रोडिकोट स्वास्थ्य चौकीमा ल्याईएको छ ।