आठबिसकोटमा बैङ्किङ शिविरमार्फत गाउँमै भत्ता वितरण 

रुकुम पश्चिमको आठबिसकोट नगरपालिकाले विभिन्न वडाहरुमा बैङ्किङ शिविर आयोजना गरेर सामाजिक सुरक्षा भत्ता वितरण गरेको छ ।

नगरपालिकाले वडा नम्वर ९ मा रहेको प्रभु बैंक र सम्बन्धित वडा कार्यालयसँगको साझेदारीमा गाउँमै गएर सामाजिक सुरक्षा भत्ता वितरण गरेको हो । 

नगरपालिकाका निमित्त प्रमुख प्रशासकीय अधिकृत राजेश गौतमले सबैभन्दा टाढाको दुरी र दुर्गममा रहेका वडाहरुलाई लक्षित गरेर गाउँमै सामाजिक सुरक्षा भत्ता वितरण गरिएको जानकारी दिनुभयो । बैंकसँगको सहकार्यमा नगरपालिकाको टिम परिचालन गरेर घुम्ती शिविरमार्फत भत्ता बाँडिएको हो ।

जेष्ठ नागरिक, अपाङगता भएका व्यक्तिहरु, बालबालिका र एकल महिलाहरुले पाउने सामाजिक सुरक्षा भत्ता लिन बैंकमै पुग्न समस्या हुने गरेको र  गाउँमै वितरण गर्न माग भएपछि उक्त मागको सम्बोधन गरिएको नगरपालिकाले जनाएको छ ।

निमित्त प्रमुख प्रशासकीय अधिकृत गौतमका अनुसार वडा नम्वर १, २ र ३ को लागि गाउँमै गएर भत्ता वितरण गरिसकिएको छ भने वडा नम्वर ४, ५ र ६ को लागि शिविर सञ्चालन भईरहेको छ । नगरपालिकाको केन्द्र वडा नम्वर ९ मा रहेको बैंकबाट टाढाको दुरीमा रहेका वडा नम्वर १३ र १४ को लागि समेत शिविर सञ्चालनको बारेमा आवश्यक छलफल गरिने उहाँले बताउनुभयो । 

वडा नम्वर ५ का वडा अध्यक्ष घनश्याम भण्डारीले गाउँमै शिविर सञ्चालन गरेर भत्ता विरतण भईरहेको जानकारी दिनुभयो । उहाँका अनुसार गाउँमै भत्ता उपलब्ध गराउँदा जेष्ठ नागरिक, अपाङगता भएका व्यक्तिहरु, बालबालिका र एकल महिलाहरुलाई सहज भएको छ ।

गाउँमै भत्ता पाउँदा लाभग्राहीहरु समेत खुसी भएको उहाँले जनाउनुभयो । आफ्नो वडाका मात्र १५० बढी लाभग्राहीले शिविरबाट सेवा लिएको उहाँले बताउनुभयो । 

यसअघि यी वडाहरुबाट बैंकसम्म आउन मात्रै दुई/तीन दिन लाग्ने, यातायात खर्च, खाना तथा खाजा र बास बस्नुपर्ने अवस्था रहेकोमा भत्ता लिन थप झन्झट झेल्नु परेको गुनासो आउने गरेको थियो । जसोतसो बैंकसम्म पुगेका जेष्ठ नागरिकहरु थप केहि दिन लाईन लाग्नुपर्ने अवस्था समेत सिर्जना हुने गरेको थियो । गाउँमै भत्ता पाउँदा भने राहत भएको लाभग्राहीहरुको भनाई रहेको छ ।