चौरजहारी बजारमा टिपरबाट सिमेन्ट झार्ने क्रममा दुई मजदुर घाईते

रुकुम पश्चिमको चौरजहारीमा टिपरबाट सामान झार्ने क्रममा दुई मजदुर घाईते भएका छन् । 

सोमबार दिउँसो चौरजहारी नगरपालिका -१ स्थित बजारमा रा १ ख २३१० नम्वरको टिपरबाट सिमेन्ट झार्ने क्रममा टिपरको ढालाले लागेर दुई मजदुर घाईते भएको प्रहरीले जानकारी दिएको छ । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक ऋषि पाठकका अनुसार घाईते हुनेहरुमा चौरजहारी नगरपालिका १, निवासी २७ वर्षीय कालो बादी र कपिलवस्तु जिल्लाको गगौली गाउँपालिका १ घर भई हाल चौरजहारी नगरपालिका १ बस्ने २६ वर्षीय सुरज बिक रहेका छन् ।

रोकि राखेको टिपरबाट सिमेन्ट झार्ने क्रममा पछाडिबाट आएको क.प्र.०३–००१ त ०००३ नम्वरको ट्याक्टरले ठक्कर दिदा दुर्घटना भएको प्रहरी निरीक्षक पाठकले जनाउनुभयो । 

घाईते दुवै जनालाई चौरजहारी अस्पतालमा सामान्य उपचारपछि थप उपचारको लागि नेपालगञ्ज रिफर गरिएको छ । प्रहरीका अनुसार घाईते बादीको दाहिने कान र टाउकोमा चोट लागेको छ भने बिकको आँखा मुनि र टाउको पछाडिको भागमा चोट लागेको छ । 

दुर्घटना पश्चात ईलाका प्रहरी कार्यालयबाट खटिएको प्रहरी टोलीले ट्याक्टर र टिपरलाई नियन्त्रणमा लिएको जनाएको छ । ट्याक्टर चालक सल्यानको कुमाख गाउँपालिका निवासी १७ वर्षीय विवश बिक भने फरार रहेकोले खोजी कार्य भईरहेको बताईएको छ ।