रुकुमको दुर्गम गाउँमा सेनाको निःशुल्क स्वास्थ्य शिविर

नेपाली सेनाको चण्डीदल गणले रुकुम पश्चिमको गोतामकोटमा निःशुल्क प्राथमिक स्वास्थ्य परिक्षण शिविर सम्पन्न गरेको छ । 

शनिबार आठबिसकोट नगरपालिका –४ स्थित गोतामकोट स्वास्थ्य चौकीमा भएको एक दिने शिविरबाट ६७३ जनाको स्वास्थ्य परिक्षण गरिनुका साथै निःशुल्क औषधि वितरण गरिएको छ । 

चण्डीदल गणले श्री नं. १९ बाहिनी अड्डाको नेतृत्व तथा श्री नं. १९ फिल्ड एम्बुलेन्स गुल्मको समन्वयमा जिल्लाको दुर्गम गाउँमा स्वास्थ्य शिविर सम्पन्न गरेको हो । चण्डीदल गण रुकुम पश्चिमका अनुसार शिविरबाट ५१८ जना महिला र १५५ जना पुरुषले सेवा लिएका छन् । जसमध्य ६२ जना बालबालिका रहेका छन् ।

शिविरबाट स्त्री रोग जाँच तथा उपचार, मनोसामाजिक परामर्श सेवा, स्वास्थ्य परिक्षण तथा औषधि वितरण सेवा प्रदान गरिएको थियो । शिविरबाट १८६ जनाले स्त्री रोग सम्बन्धि र एक सय जनाले मनोसामाजिक परामर्श सेवा लिएका छन् ।  

गाउँमै शिविर मार्फत निःशुल्क सेवा पाउँदा यहाँ सर्वसाधारणहरु खुसी भएका छन् । आठबिसकोट नगरपालिकाका उपप्रमुख धनकुमारी शाहीले नेपाली सेनाले दुर्गम बस्तीमा स्वास्थ्य शिविर सञ्चालन गरेर ग्रामिण क्षेत्रमा सर्वसाधारणको स्वास्थ्य जाँच र उपचार गरेको बताउनुभयो । उहाँले चिकित्सकसहितको टोलीबाट भएको निःशुल्क स्वास्थ्य जाँच र औषधि समेतको व्यवस्थाबाट गाउँवासीमा ठुलो राहत भएको उल्लेख गर्नुभयो । 

श्री नं. १९ बाहिनी अड्डाका बाहिनीपति सहायक रथी पदमबहादुर बुढा (पिएचडी)को नेतृत्वको टोलीले शिविर सञ्चालन गरेको हो । बाहिनीपति सहायक रथी बुढाको प्रमुख आतिथ्यतामा रहेको उक्त शिविरमा चण्डीदल गणका गणपति, श्री नं. १९ फिल्ड एम्बुलेन्स गुल्मका चिकित्सकहरुको उपस्थिति रहेको थियो । 

शिविर आठबिसकोट नगरपालिका कार्यालय, वडा नम्वर ४ को कार्यालय, स्वास्थ्य सेवा कार्यालय, ओरेक नेपाल, गोतामकोट स्वास्थ्य चौकी लगायतको सहकार्यमा सम्पन्न गरिएको हो ।