मुसिकोट खलङगा बहुमुखी क्याम्पसको स्ववियु निर्वाचन प्रक्रिया अगाडि बढाउन माग

रुकुम पश्चिमको मुसिकोट नगरपालिका १ मा रहेको मुसिकोट खलङगा बहुमुखी क्याम्पसको स्वतन्त्र विद्यार्थी युनियन (स्ववियु) निर्वाचन प्रक्रिया अगाडी बढाउन माग गरिएको छ । 

आईतबार विभिन्न चार विद्यार्थी संगठनहरुले संयुक्त विज्ञप्ती जारी गर्दै निर्वाचन निर्देशिका र कार्यविधि अनुसार निर्वाचन प्रक्रिया अगाडी बढाउन माग गरेका हुन् । 

मध्यपश्चिम विश्वविद्यालय अन्तर्गतको यस क्याप्पसमा निर्वाचनको बिषयलाई लिएर नेपाल विद्यार्थी संघ र अनेरास्ववियुले शनिबार विभिन्न चार वटा माग राखेर क्याम्पस प्रशासनमा तालाबन्दी गरेका थिए । 

यस क्याम्पसमा चैत १८ गते निर्वाचन हुने तालिका तोकिएको थियो । क्याम्पस प्रशासन र निर्वाचन समितिमा तालाबन्दी भएपछि आईतबार अखिल (क्रान्तिकारी), नेकपा एस. अनेरास्ववियू, अखिल क्रान्तिकारी (बहुमत) र अखिल (समाजवादी) तोकिएकै समयमा निर्वाचन गर्न विज्ञप्ती जारी गरेका हुन् । 

विज्ञप्तीमा क्याम्पसमा तालाबन्दी हुनु, झैझगडा हुनु, वादविवाद हुनु कुनैपनि दृष्टिकोणले राम्रो पक्ष नभएकोले यस्तो परिस्थितिमा मुकदर्शक भएर बस्न नहुने उल्लेख गरिएको छ ।  विज्ञप्तीमा निर्धारित समयमै स्ववियु चुनाव गराउन र कुनैपनि बहाना र प्रलोभनमा परी निर्वाचन स्थगित नगर्न जोड दिईएको छ ।

सम्बन्धित समाचार ...

मुसिकोट खलङगा बहुमुखी क्याम्पसमा तालाबन्दी