रुकुम पूर्वमा शिविरमार्फत मानसिक स्वास्थ्य उपचार

रुकुम पूर्वको सिस्ने गाउँपालिका ५ रुकुमकोटमा मानसिक स्वास्थ्य शिविर सञ्चालन भएको छ । बिहिबार देखि सिस्ने गाउँपालिकाको आयोजना तथा भूमे गाउँपालिका, पुथा उत्तरगंगा गाउँपालिका र स्वास्थ्य कार्यालय रूकुम पूर्वको समन्वयमा दुई दिने निशुल्क स्वास्थ्य शिविर सुरु भएको हो। 

नेपाल जनजागरण मञ्च र यु.एम.एन. रूकुम पूर्व क्लस्टरको आर्थिक तथा प्रविधिक सहयोगमा सञ्चालन भएको उक्त निशुल्क स्वास्थ्य शिविरमा मानसिक स्वास्थ्य जाँच, मनोसामाजिक परामर्श सेवा, निशुल्क औषधि वितरण र सामान्य स्वास्थ्य परीक्षण जस्ता सेवा प्रदान गरिने नेपाल जनजागरण मञ्चका कार्यक्रम संयोजक तथा मनोविद् रूकुम टमटाले जानकारी दिनुभयो । 

मानसिक स्वास्थ्य समस्या भएका जिल्लास्थित बिरामीहरुले शिविरमा प्रत्यक्ष लाभ लिने उहाँले बताउनुभएको छ । यस अघि पनि युएमएन र नेपाल जनजागरण मन्चको सहयोगमा तीन स्थानमा मानसिक स्वास्थ्य शिविर सन्चालन गरिएको थियो । पछिल्लो समय मानसिक स्वास्थ्य समस्या भएका बिरामीहरुको बढ्दो चापलाई मध्यनजर गरी शिविर आयोजना गरिएको बताईएको छ ।

निशुल्क स्वास्थ्य शिविरले स्थानीय बासिन्दाहरूलाई सहज र गुणस्तरीय स्वास्थ्य सेवा प्राप्त गर्न ठूलो टेवा पुग्ने विश्वास लिइएको छ ।

शिविर उद्घाटन कार्यक्रममा जिल्ला समन्वय समिति रूकुम पूर्वका प्रमुख मेघ बहादुर श्रेष्ठले जिल्लामा पछिल्लो समय सबैले खुलेरै आफ्नो समस्या राख्ने बानीको विकास भएकाले त्यो राम्रो पक्ष भएको बताउनुभएको छ । प्रमुख श्रेष्ठले मानसिक स्वास्थ्य समस्या भएको मान्छेहरू रूकुम पूर्वमा पनि धेरै भेटिएको बताउनुहुदै यो समस्यालाई धेरै ठुलो समस्याको रूपमा हेर्नु भन्दा समस्या समाधान कसरी गर्ने भनेर खोजी गर्ने बानीको विकास गर्न जरुरी रहेको र त्यसले धेरै हदसम्म समस्याको समाधान हुने विश्वास व्यक्त गर्नुभएको छ ।  

यस्तै कार्यक्रममा यस अघि आयोजना गरिएका शिविरमा सेवा लिई समस्याबाट मुक्त भएका बिरामीहरुले समेत आफ्ना अनुभव व्यक्त गरेका थिए । 

सिस्ने गाउँपालिकाका अध्यक्ष कृष्ण रेग्मीको अध्यक्षतामा सुरु भएको निशुल्क स्वास्थ्य शिविर उद्घाटन कार्यक्रमको प्रमुख अतिथिका रूपमा जिल्ला समन्वय समिति रूकुम पूर्वका प्रमुख मेघ बहादुर श्रेष्ठ रहनुभएको थियो । भने भूमे गाउँपालिकाका अध्यक्ष होम प्रकाश श्रेष्ठको विशेष आतिथ्यता रहेको थियो ।

त्यस्तै शिविरमा सिस्ने गाउँपालिकाका उपाध्यक्ष गोपाल रेउले, नेपाली कांग्रेसका कार्यवाहक सभापति भीम बहादुर खड्का, जनजागरण मञ्च रूकुम पश्चिमका अध्यक्ष टेक बहादुर कुसारी, युएमएन रूकुम पूर्व क्लस्टरका टिम लिडर शिव प्रसाद अधिकारी, सिस्ने गाउँपालिकाका प्रमुख प्रशासकीय अधिकृत रेवत बहादुर बुढाथोकी, जिल्ला प्रहरी कार्यालयका सूचना अधिकारी हिम बहादुर केसी, नेपाल पत्रकार महासंघका सचिव निराजन सिर्पाली लगायत विभिन्न व्यक्तित्वहरूको उपस्थिति रहेको थियो ।