मुसिकोटको खारादह, छिङ र जन्तिबस्ने लेकमा लागेको आगो नियन्त्रणमा आउन सकेन

रुकुम पश्चिमको मुसिकोट नगरपालिका वडा नम्बर ६ खारादह देखि वडा नम्बर १ को छिङ र जन्ती बस्ने लेकमा लागेको आगो नियन्त्रणमा आउन सकेको छैन । शुक्रबार रातीदेखि यस क्षेत्रमा भिषण आगलागी भएको छ । 

डिभिजन वन कार्यालय रुकुम पश्चिमका प्रमुख शेरबहादुर परियारले शुक्रबार रातीदेखि सुरु भएको वन डढेलो अझै नियन्त्रमा आउन नसकेको जानकारी दिनुभयो । 

उक्त वन डढेलो  नियन्त्रण गर्न  डिभिजन वन कार्यालयको टोली, नेपाली सेना, नेपाल प्रहरी, सशस्त्र प्रहरी, मुसिकोट नगर प्रहरी तथा स्थानीयवासी समेत गरी दुई सय जना खटिएको तर नियन्त्रणमा आउन नसकेको उहाँले जनाउनुुभयो । 

७ घन्टा लामो प्रयास गर्दा पनि आगो पुर्णरुपमा नियन्त्रण नआएकोले स्थानीयवासीलाई सतर्क रहन उहाँले अनुरोध गर्नुभयो । रातको समयमा आगो अझै फैलन सक्ने सम्भावना रहेकाले  सजगता अपनाउन आग्रह गरिएको उहाँले उल्लेख गर्नुभयो ।

गाउँवस्तीमा आगलागीको जोखिम बढेमा सुरक्षा निकायहरु तथा  डिभिजन वन कार्यालय सम्पर्क गर्न समेत उहाँले सूचित गर्नुभयो ।