सल्यानका ७८ जना किसानलाई गोलासहितको मौरीघार वितरण

सल्यानको बनगाड कुपिण्डे नगरपालिका -७ गैरीकटेरीका ७८ जना किसानहरुलाई मौरीका गोलासहितका आधुनिक घार वितरण गरिएको छ।

भिरचुली सामुदायिक वन उपभोक्ता समूह र पारिस्थितिकीय प्रणालीमा आधारित अनुकूलन आयोजना (इबिए) को आर्थिक सहयोगमा गोलासहितका मौरीघार वितरण गरिएको हो। 

वन समूहका अध्यक्ष रिम बहादुर बस्नेतका अनुसार ६ लाख ७५ हजार रुपैयाँ इविए आयोजनाबाट र वन समुहबाट ५० हजार ४ सय रुपैया गरि जम्मा ७ लाख २५ हजार ४ सय रुपैया खर्च गरि ७८ वटा आधुनिक मौरीको घार खरिद वितरण गरिएको हो। उहाँका अनुसार मौरीपालनका लागि यहाँ प्रशस्त वनजङ्गल र चरन क्षेत्र उपलब्ध भएकाले यो व्यवसाय फस्टाउन सक्ने देखिन्छ।

मौरीपालनको उच्च सम्भावना भएकाले मौरीका घार वितरण गरिएको र आगामी दिनमा यसलाई व्यावसायिक रूपमा विस्तार गर्दै आयआर्जनसँग जोड्ने लक्ष्य रहेका उहाँले उल्लेख गर्नुभयो । 

आयोजनाका जिल्ला संयोजक दिगम्वर दाहालका अनुसार मौरीपालनलाई व्यावसायिक बनाउन यो पहल गरिएको हो। ​कृषि कर्म गर्दै आएका स्थानीय नागरिकको आर्थिक उन्नति गर्न उद्यमशीलतासँग जोड्नु आवश्यक रहेकोले मौरीपालनको प्रचुर सम्भावना भएकाले यसलाई व्यावसायिक रूपमा अगाडि बढाउने निष्कर्षमा पुगेको उहाँको भनाई छ । परम्परागत मौरीघारबाट मौरीपालन गर्दै आउनुभएका मौरीपालक किसानहरुलाई आधुनिक मौरीघार उलपब्ध गराईएको हो । 

​गोलासहितको मौरीघारबाट व्यवसायिक बन्न सहज हुने र फाइदाजनक हनेमा उहाँले विश्वास व्यक्त गर्नुभयो । आधुनिक मौरीघार कार्यक्रममा बनगाड कुपिण्डे नगरपालिका ७  का वडा अध्यक्ष जीवन सिंह ठकुरीले मौरी व्यवसायीरुपमा पालन गर्नु पर्नेमा जोड दिनु भएको छ । इविएले प्रत्यक्ष जनतामा लाभ हुने कार्यक्रम गर्दै आएको र आउदो दिनहरुमा यस्ता कार्यक्रम निरन्तर हुन पर्नेमा जोड दिनु भएको छ । सामुदायिक वनले अन्य समुह भन्दा राम्रो काम गरेको र यस क्षेत्रमा पोखरी निर्माण, चेक ड्याम्म, वृक्षरोपण, गह्रा सुधार, ड्राइ हाउस लगाएतका काम गरेको उहाँले बताउनु भयो । 

कार्यक्रममा आयोजना जिल्ला सयोजक दिग्मवर दाहाल, वडा सदस्य बहादुर कवर, शिक्षक नारद घर्ती, गोविन्द कवर, नेपाल पत्रकार महासंघ सह सचिव इन्द्रबहादुर बुढाथोकी, लगायतको उपस्थिती रहेको थियो । वन समूहले किसानहरूलाई आधुनिक प्रविधिमा आधारित मौरीपालनमा प्रेरित गर्दै उनीहरूको आर्थिक सुधारका लागि यो कार्यक्रम सञ्चालन गरेको जनाएको छ।