नेभिगेशन
राष्ट्रिय

भूकम्पका दुई झड्काले घरहरु चर्कायो, त्रासमा भूकम्पपीडित

शुक्रबार साँझ जाजरकोटको कुशे गाउँपालिकाकाे पैंक आसपास केन्द्रबिन्दु भएर दुई भूकम्प गएका छन् । 

८ बजेर सात मिनेटमा ५.२ र ८ बजेर १० मिनेटमा ५.५ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ ।

भूकम्पको महसुस कर्णाली प्रदेश, सुदूरपश्चिम प्रदेशका साथै लुम्बिनी प्रदेशका केही जिल्लाहरूमा पनि भएको छ ।

जाजरकोटका प्रमुख जिल्ला अधिकारी मेखबहादुर मंग्रातीले जिल्लाको कुशे गाउँपालिकामा केही घरहरू भत्किएको खबर आएको बताउनुभयो । उहाँका अनुसार हालसम्म मानवीय क्षति भएको विवरण आएको छैन । कुशेमा केही घर भत्किएको खबर छ । क्षतिको विवरण संकलन भईरहेको उहाँले जानकारी दिनुभयो । 

त्यसैगरी रुकुम पश्चिमका विभिन्न स्थानमा भूकम्पको कारण घरहरु चर्किएका छन् । रुकुम पश्चिमका प्रमुख जिल्ला अधिकारी कुलबहादुर जिसीले अहिलेसम्म क्षतिको विवरण भने प्राप्त नभएको बताउनुभयो । सबै पालिकाहरूमा बुझेको र प्रहरीलाई समेत विवरण संकलनका लागि भनिएको जानकारी गराउँदै अहिलेसम्म कतै पनि क्षति भएको जानकारी प्राप्त नभएको उहाँले बताउनुभयो ।

चौरजहारी नगरपालिका १ निवासी श्रवन कुमार लामिछानेको घर भूकम्पले भत्किएको छ । २०८० कात्तिक १७ गतेको भूकम्पले चर्किएको उक्त घर शुक्रबार साँझको भूकम्पले भत्काएको हो । त्यसैगरी सोहि स्थानका राजकुमार बादीको हालै निर्माण सम्पन्न भएको घर पनि भूकम्पले चर्काएको छ ।आठबिसकोट नगरपालिका ९ का प्रकाश गौतमले भूकम्पले घर चर्किएको बताउनुभयो । 

२०८० कात्तिक १७ गतेको भूकम्पले चर्काएका अधिकांस घरहरुमा थप क्षति पुगेको छ । सर्वसाधारणहरु अहिले भूकम्पको त्रासमा रहेका छन् । गत वर्षको भूकम्पबाट प्रभावितहरु थप त्रासमा रहेका हुन् । सर्वसाधारणहरु अहिले खुला स्थानमा जम्मा भएका छन् । 

प्रकाशित मिति:
प्रतिक्रिया दिनुहोस्