सानीभेरीमा भएको अटो दुर्घटनामा घाईते स्वास्थ्यकर्मी खत्रीको उपचारको क्रममा मृत्यु

रुकुम पश्चिमको सानीभेरी गाउँपालिकामा भएको अटो दुर्घटनामा परेर घाईते हुनुभएका सिनियर अहेब नरबहादुर खत्रीको उपचारको क्रममा मृत्यु भएको छ । 

सानीभेरी गाउँपालिकाको  वडा नम्बर ६ स्थित आधारभूत स्वास्थ्य सेवा केन्द्रमा सिनियर अहेब पदमा कार्यरत ४३ वर्षीय खत्री गत चैत ११ गते वडा नम्वर ३ को बेलटापु नजिकै भएको अटो दुर्घटनामा परेर गम्भिर घाईते हुनुभएको थियो । 

उहाँलाई उपचारका लागि तत्काल चौरजहारी अस्पताल हुँदै प्रदेश अस्पताल सुर्खेत लगिएको थियो । त्यहाँ पनि उपचार सम्भव नभएपछि उहाँलाई नेपालगञ्ज हुँदै भारतको लखनउ लिईएको थियो । उहाँको टाउको, गर्दन, मेरुदण्ड लगायतका शरिरका विभिन्न भागमा गम्भिर चोट लागेको थियो । 

सानीभेरी गाउँपालिकाका प्रमुख प्रशासकिय अधिकृत दिपक बुढाथोकीले आज शनिबार बिहान उपचारको क्रममा उहाँको निधनको खबर आएको जानकारी दिनभयो । उहाँले सानीभेरी गाउँपालिकाले एउटा कर्तव्यनिष्ठ, इमानदार, कुशल स्वास्थ्यकर्मी गुमाएको जनाउनुभयो ।

भारतको लखनउस्थित म्याक्स अस्पतालमा उहाँको उपचार भईरहेको थियो । पछिल्लो समय स्वास्थ्य सुधारउन्मुख भईरहेको बताईएतापनि अचानक निधनको खबर सुनेको बुढाथोकीले जनाउनुभयो । 

खत्री वडा नम्वर ६ स्थित आधारभूत स्वास्थ्य सेवा केन्द्रबाट गाउँपालिकाको कार्यालयमा आएर भूकम्पको विस्तृत क्षति आकलनका लागि आएको प्राविधिकहरुको टोलीलाई लिएर वडा नम्वर ४ तर्फ जाँदै गर्दा दुर्घटनामा पर्नुभएको थियो । 

कार्यक्षेत्रबाट फर्कदै गर्दा भएको दुर्घटनामा परेर एक असल, ईमान्दार, स्वास्थ्य क्षेत्रको अब्बल हस्ती गुमाएको गाउँपालिकाले जनाएको छ । 

सानीभेरी गाउँपालिका ४ घरहुनुभएका खत्री हाल दाङबस्दै आउनु भएको थियो । उहाँको श्रीमती, एक छोरा र एक छोरी हुनुहुन्छ । उहाँको शव लखनउबाट दाङ ल्याउईदै गरेको र दाङमै अन्तेष्टि गरिने बताईएको छ ।