विपन्न नागरिकको घर बनाउँदै वडा कार्यालय

रुकुम पश्चिमको मुसिकोट नगरपालिका –५ मा घरबास नभएका विपन्न परिवारको घर वडा कार्यालयले निर्माण गर्ने भएको छ । वडा नम्वर ५ को कार्यालयले थर्पुका गाउँका ७१ वर्षीय जेष्ठ नागरिक शेरबहादुर गोर्खालीलाई घर निर्माण गरेर हस्तान्तरण समेत गरेको छ भने अन्य दुई जनाको निर्माण भईरहेको जनाएको छ । 

वडा अध्यक्ष समिर जङ्ग मल्लले एकल समेत रहनुभएका शेरबहादुरलाई दुई कोठे घर निर्माण गरेर चाबी समेत बुझाईएको र अन्य दुईको घर निर्माण भईरहेको जानकारी दिनुभयो । स्थानीय गंगाराम सुनार र भुपेन्द्र परियारको घर पनि यसै आर्थिक वर्षमा निर्माण पुरा गरेर हस्तान्तरण गर्ने योजना रहेको उहाँले जनाउनुुभयो ।

आफ्नो जग्गाधनी पूर्जा भएर पनि घर नभएकाहरुको लगत संकलन गरेर वडा कार्यालयले घर निर्माण गरिदिएको हो । भौतिक पूर्वाधारमार्फत प्राप्त १० लाख बजेटबाट पहिलो चरणमा वडामा तीन जना घरबासविहीनको घर निर्माण गर्न लागिएको उहाँको भनाई छ ।

वडामा अझै अन्य १, २ परिवार घरबासविहीन रहेकाले अर्को वर्ष समेत यस कार्यक्रमलाई निरन्तरता दिने वडा अध्यक्ष मल्लले उल्लेख गर्नुभयो । विपन्न परिवारलाई पनि आफ्नै घरको छानामुनि ल्याउने सोच रहेको मल्लको भनाई छ । 

मुसिकोट नगरपालिका प्रमुख महेन्द्र केसीले वडा कार्यालयले घरबासविहीनलाई घर बनाइदिएर उदाहरणीय काम गरेको बताउनुभयो । उहाँले बर्षौदेखि अर्काको घरमा साहारा मागेर बस्दै आउनुभएका शेरबहादुर लगायतलाई घर बनाइदिएर वडाले सह्रानीय काम गरेको उल्लेख गर्नुभयो । नगर प्रमुख केसीले घर निर्माणपश्चात शौचालय, खानेपानी, लत्ताकपडा लगायत अन्य सामग्री पनि आवश्यक पर्ने भएकाले नगरपालिकाले सहयोग गर्ने प्रतिबद्धता जनाउनुभयो ।  

घर पाएपछि शेरबहादुरले आफ्नै घरमा बस्न पाउँदा खुसी बताउनुभयो । उहाँले अरुकै घरमा बसेर ७० वर्ष बिताएको भएतापनि मर्ने बेलामा आफ्नै घरमा मर्न पाउने धोको रहेकोले वडा कार्यालयले आफ्नै घर बनाईदिएको उल्लेख गर्नुभयो ।

घरमा शौचालय, खानेपानी, लत्ताकपडा, खाद्यान्न लगायतका सामग्री नभएकोले उहाँले सहयोगको याचना गर्नुभयो ।