चौरजहारीस्थित इलाका प्रशासनबाट एक हजार तीन सय बढीलाई सेवा

रुकुम पश्चिमको चौरजहारीमा रहेको इलाका प्रशासन कार्यालयबाट एक वर्षमा एक हजार तीन सय बढीले सेवा लिएका छन् । कार्यालय स्थापनाको एक वर्षमै एक हजार ३३८ जना सेवाग्राहीले सेवा लिएको कार्यालयले जनाएको छ । 

कार्यालय प्रमुख तोषराज केसीका अनुसार स्थापनाको सुरु वर्षमा नाबालक परिचय पत्र, नागरिकता वितरण, दलित, जनजाति र खसआर्य प्रमाणित तथा अन्य सिफारिससहितका सेवा प्रवाह गरिएको छ । जसमध्ये गत वर्षको चैत देखि हालसम्म एक हजार दुईसय २४ जनालाई नागरिकता प्रदान गरिएको हो । त्यस्तै नाबालक परिचयपत्र आठ जनालाई, दलित जनजाति र खस आर्य प्रमाणित ८८ जनालाई र अन्य सिफारिस १८ जनालाई प्रदान गरिएको छ ।

नाबालक परिचयपत्रको हकमा १६ वर्ष भन्दा कम उमेरलाई परिचय पत्र उपलब्ध गराइएको छ । आमा वा बुवा विदेशमा रहेका तथा अध्ययनका लागि नेपाल बाहिर जानेलाई परिचयपत्र दिइएको इलाका प्रशासन कार्यालयले जनाएको छ । अन्य सिफारिस अन्तर्गत जन्म मिति, नाम, थर, ठेगाना अथवा शैक्षिक प्रमाणपत्रमा त्रुटि भएकालाई सिफारिस दिइएको छ ।

कार्यालयबाट सुरुवाती चरणदेखि नै नयाँ नागरिकता लगायत अन्य सेवा प्रवाहको काम भएतापनि प्रतिलिपि र राष्ट्रिय परिचयपत्रको सेवा भने प्रवाह भएको छैन । जसको लागि यहाँका सेवाग्राहीहरु जिल्ला प्रशासन कार्यालयमा जानुर्पे अवस्था रहेको छ ।

नागरिकतापछि अनिवार्य गरिएको राष्ट्रिय परिचय पत्र पनि आगामी वर्षदेखि इलाका प्रशासनबाटै उपलब्ध गराउन थप पहल भइरहेको कार्यालय प्रमुख केसीले बताउनुभयो । स्थानीयवासीले समेत इलाका प्रशासनबाटै नागरिकता प्रतिलिपि र राष्ट्रिय परिचय पत्रको काम भएमा थप सहज हुने जनाएका छन् ।

विगत एक वर्षदेखि घर दैलो नजिकैको कार्यालयबाट नागरिकता लगायतका सेवा उपलब्ध हुँदा स्थानीयलाई सहज भएको चौरजहारी नगरपालिका वडा नम्वर १ का वडा अध्यक्ष ईन्द्रे गिरीले बताउनुभयो । उहाँका अनुसार पालिका भित्रका नागरिकहरु जिल्ला सदरमुकाम जानैपर्ने बाध्यता हटेको छ भने समय र पैसाको समेत बचत भएको छ । 

गत वर्षको माघ ८ गते स्थापना गरिएको इलाका प्रशासनले चैत १२ गतेदेखि नियमित सेवा प्रवाहको काम सुरु गरेको थियो ।