काठमाडौंमा चर्कियो शिक्षक आन्दोलन, रुकुममा रोकियो विद्यार्थी भर्ना अभियान

रुकुम पश्चिमका विभिन्न विद्यालयहरुले आज वैशाख २ देखि हुने भनिएको विद्यार्थी भर्ना अभियान स्थगित गरेका छन् । 

शिक्षा ऐनको माग गर्दै काठमाडौंमा भईरहेको आम शैक्षिक हड्तालको कारण विद्यालयमा भर्ना अभियान लगायतका कार्यक्रमहरु स्थगित गरिएको विद्यालयले जनाएका छन् । 

जिल्लाको मुसिकोट नगरपालिका –१ खलङगामा रहेको त्रिभुवन जनता माध्यमिक विद्यालयका प्रधानाध्यापक गोपीराम केसीले एक सूचना जारी गर्दै भर्ना अभियान स्थगित गरिएको जानकारी दिनुभयो । 

उहाँले गत चैत २० गतेदेखि शिक्षक महासंघको नेतृत्वमा राजधानीकेन्द्रित शैक्षिक आन्दोलन र २५ गतेबाट अनिश्चितकालिन शैक्षिक आम हड्ताल चलिरहेकोले आजदेखि हुने भनिएको भर्ना अभियान स्थगन गरिएको बताउनुभयो । प्रधानाध्यापक केसीले अर्को सूचना जारी नभएसम्मको लागि विद्यार्थी भर्ना अभियान लगायतका सम्पूर्ण कार्यक्रमहरु नहुने उल्लेख गर्नुभयो । 

त्यसैगरी त्रिवेणी गाउँपालिका –७ मुरुडाँडामा रहेको साधारण माध्यमिक विद्यालयले पनि भर्ना अभियान स्थगित गरेको जनाएको छ । विद्यालयका प्रधानाध्यापक भीमबहादुर बुढाथोकीले वैशाख २ गतेबाट हुने भनिएको विद्यार्थी भर्ना अभियान लगायतका कार्यक्रममहरु शिक्षकहरुको आन्दोलन तथा अनिश्चितकालिन आम हड्तालको कारण स्थगन गर्नुपरेको जनाउनुभयो । 

जिल्लाका अन्य विद्यालयहरुले पनि भर्ना अभियान सञ्चालन गरेका छैनन् । देशभरबाट राजधानीकेन्द्रित शिक्षकहरुले शिक्षा ऐनको माग गर्दै काठमाडौंमा आन्दोलन गरिरहेका छन् । माग पुरा नभएसम्म आन्दोलन चर्काउने उनीहरुको भनाई छ ।