चौरजहारी र वीरेन्द्रनगर नगरपालिका बिच असल अभ्यास आदान प्रदान

रुकुम पश्चिमको चौरजहारी नगरपालिका र सुर्खेतको वीरेन्द्रनगर नगरपालिका बिच असल अभ्यास आदान प्रदान गरिएको छ । 

शुक्रबार चौरजहारी नगरपालिका कार्यालयमा वीरेन्द्रनगर नगरपालिकाको टोलीलाई चौरजहारी नगरपालिकामा स्वागतसँगै असल अभ्यास आदान प्रदान गरिएको हो । 

चौरजहारी नगरपालिकाका निमित्त प्रमुख प्रशासकीय अधिकृत शेरप्रसाद ढकालले वीरेन्द्रनगर नगरपालिका प्रमुख मोहनमाया ढकाल नेतृत्वको टोली र चौरजहारी नगरपालिकाका प्रमुख पुष्प वादी नेतृत्वको टिम बिचमा असल अभ्यास आदान प्रदान गरिएको हो । 

कार्यक्रममा प्रस्तुतिकरणमार्फत चौरजहारी नगरपालिका र वीरेन्द्रनगर नगरपालिकाले सञ्चालन गरेका असल अभ्यासहरु जानकारी गराईएाको थियो । यसका साथै स्थानीय तहमा विकास र समृद्धिका अवसर र चुनौतीका विषयमा साक्षात्कार गरिएको ढकालले जनाउनुभयो । 

चौरजहारी नगरपालिका प्रमुख पुष्प वादीले दुई नगरपालिका बिचको असल अभ्यास आदान प्रदानले विकास र सेवाप्रवाहमा नवीनता अनुशरणका साथै आपसी सम्बन्ध थप सुदृढ हुने विश्वास व्यक्त गर्नुभयो । 

वीरेन्द्रनगर नगरपालिका प्रमुख ढकालले संघीयतापछि तीव्र  विकासले गति लिएको उल्लेख गर्दै दुर्गमका स्थानीय तहहरूमा पनि थुप्रै सिक्न लायक अभ्यास गरेको बताउनुभयो । चौरजहारी नगरपालिकाले सञ्चालन गरेका असल अभ्यास  प्रशंसनीय एवम् अनुकरणीय भएको उहाँको भनाइ छ । 

वीरेन्द्रनगर नगरपालिका प्रमुख ढकाल नेतृत्वको टोलीमा नगर उपप्रमुख  नीलकण्ठ खनाल, प्रमुख प्रशासकीय अधिकृत लक्ष्मीप्रसाद वास्कोटा, वडा अध्यक्ष, कार्यपालिका सदस्य लगायतको सहभागिता रहेको थियो भने चौरजहारी नगरपालिका प्रमुख बादी नेतृत्वको टोलीमा उपप्रमुख ईश्वरी शर्मा बिएम, निमित्त प्रमुख प्रशासकीय अधिकृत शेरप्रसाद ढकाल, वडा अध्यक्षहरु, कार्यपालिका सदस्य, कर्मचारी लगायतको सहभागिता रहेको थियो ।