सोसल मिडिया
रुकुम पूर्व / सिस्ने गाउँपालिका वडा नम्वर ५ का टिकाराम कार्की जिल्ला मालपोत कार्यालय रुकुमकोट धाउन थालेको ६ दिन भयो । तर उहाँको जग्गा पासको काम अझै भएको छैन ।
सिस्ने गाउँपालिका ६ नम्वर वडाका केवेन्द्र गौतमले बैंक ग्यारेन्टि बनाउनको लागि मालपोत कार्यालयमा लगातार हिड्न लागेको आज तीन भैसक्यो । मालपोत कार्यालयले उहाँलाई तीन दिन सम्म बैंक ग्यारेन्टिको लागि जग्गा धितो राखेको जग्गालाई रोक्का गरेको पत्र तयार गर्न सकेको छैन ।
टिकाराम र केवेन्द्र जस्ता सेवाग्राहिले मालपोत कार्यालयमा हैरानी खेप्नुपरेको साता दिन भैसक्यो । कार्यालयमा नेट नचेलेपछि टाढाबाट सेवा लिन आएका सेवाग्राहि होटेलमा बसेर खर्चको बिल बढाईरहेका मात्र छैनन् एक दिनको काम हप्ता दिनसम्म नहुँदा तनावमा परेका छन् । घरबाटै आउजाउ गर्न सक्ने सेवाग्राहिहरु पनि आउजाउ मै दिन बिताउन बाध्य छन् ।
‘आज सहित लगातार ६ दिन भयो तर काम भएन,’ टिकारामले भन्नुभयो ‘दिनभर कतै काम भैहाल्छ कि भनेर कार्यालयमा कुर्नेहरु धेरै छन् ।’ उहाँले जिल्लाको सिस्ने गाउँपालिका वडा नम्वर १ र २, पुथाउत्तरगंगा गाउँपालिकाबाट समेत २, ३ दिनसम्म हिडेर आईपुगेका सेवाग्राहिहरु थप मारमा परेका छन् ।
‘बैंक ग्यारेन्टीको महत्वपूण काम चौपट भयो,’ केवेन्द्रले भन्नुभयो ‘नेटका कारण भन्दै तीन दिन सम्म काम हुन सकेको छैन ।’ मालपोतमा भएको ढिलाईको कारण केवेन्द्रको बैंकको काम हुनु सकिरहेको छैन ।
जिल्ला मालपोत कार्यालय रुकुम पूर्वमा पुग्ने सेवाग्राहिहरुले नेटको समस्याका कारण लामो समयदेखि सास्ती खेप्दै आएका छन् । मालपोत कार्यालयमा नेटको समस्या देखाउदै कर्मचारीले काम नगरेपछि सेवाग्राहीहरु मर्कामा परेका हुन् ।
केहि समययता विभिन्न कामको सिलसिलामा कार्यालयसम्म पुगेका सेवाग्राहीहरु काम हुन्छ की भनेर कार्यालय बाहिर दैनिक घण्टौ कुर्ने गरेका छन् । साँझसम्म कुर्दा पनि काम नभएपछि सेवाग्राहीहरु खाली हात फर्कनुपर्ने अवस्था सिर्जना भएको गुनासो रहेको छ । सरकारी सेवाको लागि कार्यालयमा आएर हप्तौ कुर्दा पनि काम नभएको भन्दै सेवाग्राहीले आफुहरु अप्ठ्यारोमा परेको बताएका छन् । बैंक ग्यारेन्टि, धितो, जग्गा पास लगाएतका कामहरु लिएर मालपोत पुगेका सेवाग्राहिहरु दिनदिनै रित्तो हात फर्कनु परेको छ ।
एक देखि तीन दिन लगाएर रुकुमकोटसम्म पुगेका टाढाका नागरिकहरुलाई दिनभरि मालपोत सेवाको लागि कार्यालयमा कुुर्नुपर्ने र होटेलको बसाइले थप समस्यामा पारेको बताउँछन् । नेटको समस्या देखाउदै कर्मचारिले काम नगरेको लामो समय बित्दा पनि सरोकारवाला निकायले वेवास्ता गरेको भन्दै उनीहरुले गुनासो गरेका छन् ।
सबै कामकाज अनलाईन सिस्टमबाट गर्ने भनेर सरकारले भनेपनि कार्यालयमा एउटा भरपर्दो नेटको सुविधा गर्न नसकेको भन्दै कार्यालयप्रति सेवाग्राही आक्रोशित समेत बनेका छन् ।
यस बिषयमा मालपोत कार्यालयका प्रमुख मोहनलाल केसीले सेवाग्राहीको समस्यालाई बुझ्दाबुझ्दै पनि इन्टरनेटको समस्याले काम गर्न नसकिएको बताउनुभयो । केहि दिनयता छिनमै नेट आउने र जाने समस्याको कारण काम गर्न नसकिएको र सेवाग्राहीबाट पनि गुनासो आउने गरेको उहाँले स्विकार गर्नुभयो । प्रमुख केसीका अनुसार कार्यालयमा अहिले इन्टरनेट सेवा प्रदायक कम्पनी सुविसुको नेट छ । वैकल्पिक नेटको व्यवस्था नहँुदा सेवा प्रवाहमा समस्या भएको मातपोतको भनाई छ ।
सुविसुको नेटले राम्रो काम नगरेपछि अर्को नेटको व्यवस्थापन गर्न भन्दै गत असोज महिनामै बजेटको माग गरेर विभागमा पठाएपनि अहिलेसम्म सुनुवाई नभएको प्रमुख केसी बताउनुहुन्छ ।
यस बिषयमा प्रमुख जिल्ला अधिकारी लक्ष्मी प्रसाद बास्कोटाले सेवाग्राहिबाट गुनासो आएकोले आजै समस्या समाधानका लागि मालपोत कार्यालयलाई निर्देशन दिने बताउनुभयो । साता दिन सम्म सेवाग्राहिहरु होेटेलमा बस्नु परेको, काम नभएको बिषयमा उहाँले बैकल्पीक व्यबस्था गरेर भएपनि काम नरोक्ने गरी व्यबस्था गर्न कार्यालय प्रमुखलाई आदेश दिने प्रमुख जिल्ला अधिकारी बास्कोटाले उल्लेख गर्नुभयो ।
