रुकुम पश्चिम हुँदै रुकुम पुर्व देखि बाग्लुङ जोड्ने मध्यपहाडी लोक मार्गमा दिनहुँ आन्तरिक पर्यटकको घुइँचो बढिरहेको छ । हिउँले लोकमार्ग वरपरको डाँडाकाँडा बोटबिरुवा र सडक भरी सेताम्य हुँदा अति नै आकर्षक देखिएपछि हिउँ खेल्नेहरुको लर्को लाग्ने गरेको छ ।

गत बुधबार र बिहीवार बाक्लो हिउँ परेपछि अहिले रुकुम पश्चिमको मुसिकोट ८ स्थित गर्पाभुरी , रुकुम पूर्वको लुकुम, महत हुदै बाग्लुंग सिमाना पाथीहाल्न अधिकांशको रोजाई स्थल बनेका छन् ।

रुकुम पुर्व रोल्पा र बाग्लुङ को सिमाना पातिहाल्न बाह्रै महिना पर्यटकको रोजाइमा रहेता पनि अहिले झन् सेताम्य हिउका कारण हरेक दिन हिउँ खेल्न जानेहरुको संख्या बढ्दो छ । विगतका वर्षमा सिमाना पातीहाल्नामा आन्तरिक पर्यटकहरुको घुईचो लाग्ने गरेकामा अहिले भने बाक्लो हिउँको कारण त्यहाँसम्म मान्छे पुग्न मुश्किल भैरहेको बताईएको छ ।

अहिले भूमे गाउँपालिका १ को लुकुम, रुपगा आसपासको क्षेत्रमा हिउँ खेल्नेहरुको भिड देख्न सकिन्छ । रुकुम पूर्वकै सिस्ने गाउँपालिकाका बिभिन्न स्थान, पुथा उत्तरगंगा गाउँपालिकाका अधिकांश स्थान हिउँले सेताम्य भएका छन् ।

हिउँमा रमाउन गएका आन्तरिक पर्यटकहरु भने बास बस्न तथा उपयुक्त खाजा खाने होटेलहरुको असुविधा भएको बताउँछन् । यद्यपी त्यहाँसम्म पुग्ने पर्यटकहरु आफ्नो बन्दोबस्तीका साथ जाने गर्दछन ।