सोसल मिडिया
रुकुम पूर्व / सोमबार गाई चराउन जंगलमा गएका एक बालकको मृत्यु भएको छ । संगै गोठाला गएका साथीसँग एक आपसमा झगडा हुँदा एक बालकको ज्यान गएको प्रहरीले जनाएको छ ।
जिल्लाको भूमे गाउँपालिका वडा नम्बर १ लुकुमका ८ बर्षका बालकको ज्यान गएको प्रहरीले जनाएको छ ।
जिल्ला प्रहरी प्रमुख प्रहरी नायव उपरिक्षक गणेशबहादुर श्रेष्ठका अनुसार लुकुमको धामता भन्ने जङगलमा गाई चराउन गएका उनका ९ बर्षका एक साथीसँग झगडा हुँदा ८ बर्षका बालकलाई कुटपिट गरी भिरबाट धकेलेका थिए ।
भिरबाट खसालेपछि ८ वर्षीय बालक गम्भिर घाइते भएका थिए । डिएपी श्रेष्ठले दुबै जना बालकको नाम खुलाउन नमिल्ने बताउनुभयो ।
घाइते बालकलाई आफन्तले सोमबार बेलुका ७ : ३० बजे रुकुम पूर्व अस्पतालमा ल्याईएका थिए । अस्पताल पुर्याए लगत्तै डाक्टरहरुले उनलाई मृत घोषणा गरेका हुन् ।
उनको टाउको, छाती र घाँटीमा गम्भिर चोट लागेको थियो । कुटपिट गरेर भिरबाट खसाल्ने ९ वर्षीय बालक र सँगै गोठाला गएका अर्का ८ वर्षीय बालकलाई जिल्ला प्रहरी कार्यालयमा ल्याएर अनुसन्धान थालिएको प्रहरीले जनाएको छ ।
