सोसल मिडिया
रुकुम पूर्व / मध्यपहाडि लोकमार्गको रुकुम पूर्वको क्षेत्रमा सवारी साधन सञ्चालनमा रोक लगाईएको छ । हिमपातको कारण दुर्घटनाको जोखिम बढेको भन्दै लोकमार्ग सञ्चालनमा रोक लगाइएको हो ।
रुकुम पूर्व र बागलुङको सिमाना पातीहाल्ना क्षेत्रमा हिमपातको कारण दुर्घटनाको जोखिम बढेकाले मध्यपहाडी लोकमार्गमा सवारी सञ्चालनमा रोक लगाइएको प्रमुख जिल्ला अधिकारी लक्ष्मिप्रसाद बाँस्कोटाले जानकारी दिनुभयो ।
शनिबार राजमार्गको अवरोध हटाउने सञ्चालन समितिको बैठक बसेर उक्त निर्णय गरिएको समितिको संयोजक समेत रहनुभएका प्रजिअ बाँस्कोटाले बताउनुभयो ।
जिल्लास्थित सुरक्षा निकायका प्रमुख र यातायात व्यवसायीहरुको उपस्थितीमा गरिएको छलफल र यातायात व्यवसायीहरुको सुझावबाटै मध्यपहाडी लोकमार्गको पातीहाल्ना खण्डमा सवारी सञ्चालनमा रोक लगाउने निर्णय गरिएको हो ।
मध्यपहाडी लोकमार्गमा जमेको साढे दुई फीट हिउँ पाँच दिन लगाएर डोजरले पन्छाएको छ । तर त्यसमा सवारी सञ्चालन गर्न धेरै नै जोखिम रहेकाले लोकमार्ग बन्द गर्ने निर्णय गरिएको प्रजिअ बाँस्कोटाले जनाउनुभयो । उहाँका अनुसार यस खण्डमा सार्वजनिक सवारी साधनलाई पूर्ण रुपमा रोक लगाइएको छ । निजि फोरविलवाला गाडी भने जान सक्नेछन् ।
अत्यावश्यक परेको खण्डमा मात्र सार्वजनिक गाडि प्रहरीको अनुमतीमा यस खण्डमा चलाउन सकिने छ । गाडिको अवस्था कस्तो छ र लोड कत्तिको छ भनेर प्रहरीले उपयुक्त ठानेर पठाएको खण्डमा मात्र सार्वजनिक गाडी पातीहाल्नाको बाटो भएर जाने छन् ।
एक दुई दिनलाई भने पूर्ण रुपले लोकमार्ग ठप्प नै रहेको प्रजिअ बाँस्कोटाले बताउनुभयो । रुकुम पूर्वबाट बागलुङ जाने बाटो हिउँले चिप्लो बनाएको र उकालो पर्ने भएकाले दुर्घटना हुन सक्ने जोखिम धेरै रहेको उहाँको भनाई छ ।
बागलुङतर्फबाट भने एकतर्फी रुपमा गाडि रुकुम पूर्व आइरहेका छन् । बागलुङ जिल्ला प्रशासन कार्यालयसँग समन्वय गरेर सकभर उतापट्टीबाट पनि यस खण्डमा सवारी सञ्चालनमा रोक लगाउने प्रयास गरिरहेको प्रशासनले जनाएको छ ।
