रुकुम पश्चिमको एक वडामा चार हजार पाँच सय मिटर बाटो पिसिसी गरिएको छ । जिल्लाको मुसिकोट नगरपालिकाको वडा नम्वर ९ मा स्थानीय तहको निर्वाचनपछि उक्त सडक बनाईएको वडा अध्यक्ष नविन ओलीले जानकारी दिनुभयो ।

वडा अध्यक्ष ओलीका अनुसार वडाका बिभिन्न टोलहरुमा गरेर चार हजार पाँच सय मिटर सडक पिसिसी गरिएको हो । वडावासीहरुलाई हिडडुल गर्न समस्या भएको गुनासोपछि आम समुदायको दैनिक कामकाजमा सहजता ल्याउन बाटाघाटाहरु ब्यवस्थित गर्न वडा सरकारले प्राथमिकता दिएको वडाअध्यक्ष ओलीले बताउनुभयो ।

प्रधानमन्त्री रोजगार र मुख्यमन्त्री रोजगार कार्यक्रमको रकमबाट उक्त योजनाहरु सम्पन्न गरिएको हो ।

वडामा रहेको होल, लिङगुर टोलमा एक हजार नौ सय ५० मिटर, नमुना टोल चौखावाङमा नौ सय ६० मिटर, स्वारा कुन्सिम्ला टोलमा एक हजार एक सय ९० मिटर र होल्तारा अदुवारी टोलमा ४ सय मिटर सडक पिसिसी गरिएको वडा अध्यक्ष ओलीले मूलपाटीलाई जानकारी दिनुभयो ।

उक्त बाटो निर्माण गर्दा ७१ लाख ९९ हजार रकम लगानी गरिएको उहाँले जनाउनुभयो ।

वडा अध्यक्ष ओलीले निर्माण सम्पन्न भएका सडकहरु वडाका करिव दुई सय ४३ घरधुरिले दैनिक प्रयोग गरिरहेको दाबी गर्नुभययो । उहाँले एक घरका एक व्यक्तिले उक्त बाटो निर्माणका क्रममा रोजगार पाएको उल्लेख गर्नुभयो ।