नेत्रविक्रम चन्द विप्लव नेतृत्वको नेकपाले गरेको बन्दका कारण देशका विभिन्न भागमा प्रभाव देखीएको छ । पार्टीमाथि सरकारले लगाएको प्रतिबन्धको विरोधमा गरेको बन्दमा काठमाण्डौं उपत्यकावाहेक अन्य जिल्लाहरुमा यातायात सेवा प्रभावित भएको छ ।

काठमाण्डौं उपत्यका बाहेक प्रदेश ३ का १० जिल्लामा सवारी साधन कम सञ्चालन भएको प्रदेश ३ ट्राफिक प्रहरी कार्यालय रामनगरले जानकारी दिएको छ ।

चार पांग्रे सवारीसधानको तुलनामा मोटरसाइकल बढी सञ्चालनमा रहेका छन् । ट्राफिक कार्यालयका अनुसार दैनिक १० हजारको हाराहारीमा सवारी साधान गुड्ने नारायणगढ–मुग्लिन सडकखण्डमा सवारी आवगमन पातलो छ ।

यस्तै दैनिक करिब १४ हजार सवारी साधान गुड्ने पूर्व–पश्चिम राजमार्गमा पनि लामो दूरीका गाडी कम गुडेका छन् । काठमाडौं उपत्यकामा भने यातायातका साधनहरु निर्वाधरुपमा चलिरहेका छन् ।

कडा सुरक्षा व्यवस्थाका कारण उपत्यकामा सवारी साधनहरु सामान्य अवस्थामै चलेको प्रहरीले जनाएको छ । लामो दूरीका गाडी भने कम चलेका छन् ।

उपत्यकाबाट बाहिरिने तथा भित्रने सवारीका साधनहरु अरु दिनको तुलनामा चलेको महानगरिय ट्राफिक प्रहरी महाशाखाले जनाएको छ । विप्लवको बन्दका कारण अधिकांश निजी विद्यालयहरुले पठनपाठन बन्द गरेका छन् ।

यस्तैगरी प्रदेश १ का १४ जिल्लामा आंशिक प्रभाव परेको क्षेत्रीय ट्राफिक प्रहरी कार्यालय ईटहरीले जनाएको छ । दुई नम्बर प्रदेशका जिल्लाहरुमा पनि बन्दको प्रभाव परेको छ ।

रौतहटको चन्द्रपुर र वृन्दावन नगरपालिकाको सीमा क्षेत्रमा पर्ने हर्षाह चोकको नहरमा शंकास्पद वस्तु भेटिएको छ । शंकास्पद बस्तु बम भएको आशंकामा डिस्पोज गर्न पुगको सेनाको टोलीले प्रेसर कुकरभित्र कागजका टुक्राहरुमात्र भेट्ठाएको छ ।

प्रमुख सेनानी सुजन शाक्यका अनुसार आज बन्दको आह्वान गरेको विप्लव समूहले नै त्रास फैलाउन उक्त शंकास्पद वस्तु राखेको हुनसक्ने अनुमान प्रहरीले गरेको छ ।

रौतहट, बारा, पर्सा, सर्लाही, जनकपुर लगायत प्रदेश दुईका जिल्लाहरुमा पनि यातायात, शिक्षणसंस्था ठप्प छ भने मुख्य–मुख्य चोकहरुमा बिहानैदेखि बाक्लो सँख्यामा जनपथ तथा सशस्त्र प्रहरी खटिएका छन् ।

चितवनका विभिन्न चोकमा शंकास्पद वस्तु फेला परेको छ । नवलपुरको कावासोतीमा बम विष्फोट भएको छ । गैँडाकोटमा दुई स्थानमा भेटीएको बम प्रहरीले निष्क्रिय पारेको छ ।

सुदुरपश्चिमको कैलालीमा ठाउँ ठाउँमा रुख ढालेर बाटो अबरुद्ध भएको छ । बिहान जन्ती बसमा आगजनी भएको थियो ।