रुकुम पूर्व / बिहिबार देखि परेको पानीसँगै रुकुम पूर्वको अधिकांश क्षेत्रमा पुनः हिमपात भएको छ । जिल्लाको हिमाली र उच्च लेकाली क्षेत्रमा बाक्लो हिमपात भएको हो ।

हिमपातका कारण चिसो निकै बढेको छ । चिसोको कारण सर्वसाधारणको जनजिवन प्रभावित बनेको छ । यस वर्ष पटक-पटक भएको हिमपातका कारण मानिससँगै पशुचौपायलाई पनि समस्या भएको छ ।

जिल्लाको पुथाउत्तरगंगा गाउँपालिकाको अधिकांस क्षेत्र, सिस्ने र भूमे गाउँपालिकाको माथिल्लो क्षेत्रमा हिमपात भएको छ । यसअघि परेको हिउँ बिलाउन नपाउदै फेरी हिउँ थपिएपछि चिसोको कारण दैनिकी कष्टकर बनेको पुथाउत्तरगंगा गाउँपालिका १ मैकोटका तेजकुमार गुरुङले बताउनुभयो । मैकोट लगायत आसपासको क्षेत्रमा यसअघि परेको हिउँ बिलाउन नपाउदै पुनः थपिएपछि घरबाट बाहिर निस्कन पनि मुस्किल परेको उहाँको भनाई छ ।

बाक्लो हिउँ जमेको कारण मैकोटका नागरिकलाई गाउँपालिकाको केन्द्र तकसेरा र सदरमुकाम रुकुमकोट झर्न समस्या भएको त्यहाँका स्थानीयले बताएका छन् । हिउँले जमिन ढाक्दा पशुचौपायलाई चरण क्षेत्रको अभाव भएको मैकोटमा विकास पुनले बताउनुभयो । पहिले स्टोर गरी राखेको घाँसपात सकिएकोले अहिले पशुचौपायलाई के खुवाउने भन्ने पीर किसानलाई परेको उहाँको भनाई छ ।

हिमपातका कारण लामो समययता विकास निर्माणका कामकाज सुचारु गर्न पनि नसकिएको पुथाउत्तरगंगा गाउँपालिका १ का कार्यबाहक वडाध्यक्ष मग कामीले बताउनुभयो । समयमै विकास निर्माणको काम सुचारु गर्न नसक्दा वडालाई घाटा हुने गरेको भनाई उहाँको छ । यस्तै २, ३, ५ लगाएतका अन्य वडामा पनि विकास निर्माणका काम ठप्प अवस्था रहेको वडाहरुले बताएका छन् ।

फोटो : हेमन्त राईको फेसबुक वालबाट