रुकुम पश्चिम / रुकुम पश्चिममा सरकारद्वारा निशुल्क बाँडिएका सेनेटरी प्याड केहि पसलहरुबाट बिक्रि गरिएको पाईएको छ । जिल्लाको त्रिवेणी गाउँपालिकाले पालिका भित्रका बिभिन्न बिद्यालयमा अध्ययनरत छात्राहरुको लागि सेनेटरी प्याड निशुल्क बितरण गरेको थियो ।

निशुल्क वितरण गरिएका प्याड त्रिवेणी गाउँपालिकाको वडा नम्वर २ मा सिम्रुतुमा रहेका केहि पसलहरुबाट बिक्रि भएको एक स्थानीयले जानकारी दिनुभयो । उहाँका अनुसार आफुले पसलमा किन्न जाँदा एक प्याकेटमा राखिएका आठ पीस प्याड मध्य तीन पीस निकालेर छुट्टै प्लाष्टिकमा बेरेर समेत बेच्ने गरिएको छ । बजारमा रहेको किराना पसलले बाँकी रहेका ५ पीस प्याड ५० रुपैयामा आफूलाई बेचेको उहाँले बताउनुभयो ।

‘प्याडको बाहिर सरकारद्वारा निशुल्क बाँडिएको लेखेको छ, तर मैले पोकाबाट ३ ओटा कम भएको प्याड ५० रुपैयामा किने,’ उहाँले भन्नुभयो ‘कहिकतैबाट अनुगमन भएको पाईएन ।’

गाउँपालिकाले बिद्यालयहरुमा निशुल्क बाँडेका प्याडहरु आवश्यकता भन्दा बढी बाँडिएको समेत गुनासो रहेको छ । बाँडिएका प्याडहरु गाउँमा जथाभाबि रुपमा फालिएको अवस्थामा पाईएको बताईएको छ । छोरीहरुले स्कुलबाट ल्याउने र बुवाआमाले बेच्ने गरेको हुनसक्ने बताईएको छ ।

यस बिषयमा त्रिवेणी गाउँपालिकाका निमित्त प्रशासकीय अधिकृत रमेश पुनले उक्त गुनासो प्राप्त भएकोले तत्काल अनुगमन गरेर आवश्यक कारबाहि गरिने बताउँनुभयो । सरकारले निशुल्क वितरण गरेको सेनेटरी प्याड दुरुपयोग नगर्न समेत उहाँले अनुरोध गर्नुभयो ।