सोसल मिडिया
रुकुम पश्चिम / रुकुम पश्चिमको मुसिकोट नगर कार्यपालिकाको पहिलो बैठक बुधबार सम्पन्न भएको छ । पहिलो वैठकले चारवटा निर्णय गरेको छ ।
२३ गते सुरु गरिएको पहिलो बैठक तीन दिन पछि चार वटा निर्णय गर्दै सम्पन्न भएको हो । बैठकमा नगर प्रमुख महेन्द्र केसीले बिभिन्न आठ वटा प्रस्ताव पेश गर्नुभएको थियो । तर, वैठकले चारवटा मात्र निर्णय गरेको छ ।
नगर उपप्रमुख बिमल कुमार पुनले निर्वाचन प्रक्रियामा सहयोग गर्ने सम्पूर्ण जनप्रतिनिधि, कर्मचारी, राजनीतिक दल लगायतलाई धन्यवाद ज्ञापन गर्ने र नयाँ जनप्रतिनिधिलाई स्वागत गर्ने निर्णय भएको जानकारी दिनुभयो । त्यसैगरी कार्यपालिका बैठक सञ्चालन कार्यविधि र सवारी साधनको पार्किङको सम्बन्धमा अटोरिक्सा सञ्चालन कार्यविधि पास गर्ने निर्णय भएको उप प्रमुख पुनले बताउनुभयो ।
बैठकले मुसिकोट नगरपालिका ५ मा यस अघि बन्द अवस्थामा रहेको डाङडुङे आधारभूत विद्यालय पुनःस्थापनाको निर्णय गरेको छ । नगर प्रमुख महेन्द्र केसीले गत ९ गते पदभार ग्रहणको अवसरमा यो निर्णयमा हस्ताक्षर गरेर पदभार ग्रहण गर्नुभएको थियो । नगर प्रमुखले पदभार ग्रहणको बेला हस्ताक्षर गरेका अन्य दुई निर्णय भने बैठकले अनुमोदन गरेको छैन ।
पदबहालिको बेला नगर क्षेत्रभित्रका गरिब तथा बिपन्न समुदायका बिरामीहरुलाई जिल्ला बाहिर रिफर गर्नुपर्ने अबस्था आएमा निशुल्क एम्बुलेन्स सेवा प्रदान गर्ने र नगरपालिका ३ मुग्लुखोलामा रहेको घाटमा मृत मानव शरिर जलाउन आवश्यक पर्ने दाउरा नगरपालिकाको कार्यालयबाटै ब्यबस्था गर्ने निर्णयमा हस्ताक्षर गर्नुभएको थियो । पदभार ग्रहण गर्दाका तीन निर्णय मध्य यी दुबै निर्णयको खर्चको सीमा र श्रोत एकिन नभएकोले कार्यपालिका बैठकले पास नगरेको बताईएको छ ।
मुसीकोटको २४ सदस्यीय कार्यपालिकामा नगर प्रमुख सहित ७ जना नेपाली काँग्रेसबाट उम्मेदवार भई विजयी हुनभएका सदस्यहरु हुनुहुन्छ भने उप प्रमुख नेकपा (एकिृकत समाजवादी) बाट हुनुहुन्छ । त्यसैगरी माओवादी केन्द्रबाट उम्मेदवार हुनुभएका १६ जना सदस्यहरु कार्यपालिकाको सदस्य हुनुहुन्छ ।
मुसिकोट नगरपालिकाका प्रमुख महेन्द्रद्वारा पदभार ग्रहण
